गडचांदुर येथील देशी दारू दुकानाविरोधात महिलांचा एल्गार

*जिल्हाधिका-यां समोर केस दाखल*

सुनील तायडे

चंद्रपूर: जुलै महिन्यात सीएल  देशी दारूच्या दुकान स्थलांतरणास  ना हरकत प्रमाणपत्र देण्यासाठी गडचांदूर नगरपरिषदेने विशेष सभा बोलावली होती. कोरोना काळात लोकहिताचे प्रश्न बाजूला सारून दारूच्या दुकानासाठी  बोलाविलेल्या विशेष सभेने गडचांदूर नगरपरिषद चांगलीच चर्चेत आली आहे. गडचांदूर येथील महिलांनी संताप व्यक्त केला आहे. दारू दुकानाला विरोध करत  जिल्हाधिकारी यांच्याकडे शिवसेना नगरसेवक सागर ठाकूरवार, वैशाली गोरे, किरण अहिरकर यांनी  केस दाखल केली असल्याची माहिती ऍड दिपक चटप यांनी सोमवार(30ऑगस्ट)ला पत्रपरिषदेत दिली.जिल्हाधिकारी यांनी गंभीर दखल घेत मुख्याधिकारी यांना अहवाल मागविला असल्याचे ते म्हणाले.

यावेळी शिवसेना गटनेते सागर ठाकुरवार बालकल्याण सभापती वैशाली गोरे,नगरसेवक किरण अहिरकर,सुनीता कोडपे,ग्रामवासी शितल चौधरी,आशा झाडे,जीवनमाला आत्राम,वैशाली थेरे,राजांना ख्वाजा,ईशान कादरी यांची उपस्थिती होती.

ऍड चटप म्हणाले,17 ऑगस्ट 2011 च्या शासन निर्णयानुसार देशी दारू दुकानाची अनुज्ञप्ती नगरपरिषद हद्दीत स्थलांतरित करताना प्रभागातील 50 टक्के मतदारांची किंवा महिलांची सहमती घेणे आवश्यक आहे. मात्र अशी कोणतीही सहमती देशी दारू दुकानदाराने घेतली नसताना ना हरकत प्रमाणपत्र देण्याचा ठराव पारित करणे बेकायदेशीर आहे. तसेच, देशी दारू दुकानापासून काही अंतरावर महाविद्यालय व  वाचनालय देखील आहे. त्यामुळे दुकान सुरू झाल्यास युवकांच्या आरोग्यावर दूरगामी वाईट परिणाम होतील. महिलांवर होणारे अत्याचार देखील वाढतील. बेकायदेशीर ठरावाच्या आधारे दुकान सुरू करण्याची परवानगी देऊ नये अशी मागणी अॅड. दीपक चटप यांनी यावेळी केली.

*हि तर,काँग्रेस व राष्ट्रवादीची अर्थपूर्ण खेळी–ठाकुरवार*
देशी दारूच्या दुकानास गडचांदूर नगरपरिषदेने ना हरकत प्रमाणपत्र द्यावे म्हणून विशेष सभा बोलाविली.
काँग्रेस व राष्ट्रवादी काँग्रेसच्या नगरसेवकांनीं याबाबत मौन बाळगले आहे.त्यांची हि खेळी अर्थपूर्ण तर,नाही ना..?असा सवाल शिवसेना गटनेते सागर ठाकुरवार यांनी उपस्थित केला.जिल्हाधिकाऱ्यांनी या बाबत चौकशी करावी,अशी मागणी त्यांनी केली.

*महिलांचा विरोध…ठराव रद्द करा…*
गडचांदूर नगरपरिषदेच्या हद्दीत सर्व्हे नंबर ३६६/१, मालमत्ता क्र. ९८८ च्या इमारतीत स्थलांतरित होणाऱ्या देशी दारू दुकानास ना हरकत प्रमाणपत्र द्यावे म्हणून ठराव बहुमताने पारित झाला आहे.
गडचांदूर येथील महिलांनी देशी दारू दुकानास परवानगी देण्याचा ठराव घेणाऱ्या नगर परिषदेतील सत्ताधारी पक्ष काँग्रेस व राष्ट्रवादी काँग्रेसच्या नगरसेवकांचा विरोध करण्यासाठी महिलांनी २५ ऑगस्ट २०२१ रोजी एकदिवसीय उपोषण देखील केले होते. आता जिल्हाधिकारी यांनी गंभीर दखल  घेतली असल्याने  एकंदरीत हा मुद्दा चांगला तापणार असे चिन्ह आहे.म्हणून तो ठराव रद्द करा अशी मागणी पत्रपरिषदेत  उपस्थित महिलांना केली.
प्रभागातील महिलांचा विरोध असताना विशेष सभा बोलावून देशी दारू दुकानास ना हरकत प्रमाणपत्र देण्याची लगीनघाई करणे चुकीचे आहे. महिलांची सहमती गरजेची असून दुकान सुरू झाल्यास तीव्र आंदोलन करू,असा इशारा यावेळी बाल कल्याण सभापती वैशाली गोरे यांनी दिला.